感欣的生活隨筆 - Z 世代有趣現象

筆者其中一個工作角色係一位講師，最近開咗學，班學生都係男女混合班，佢哋有啲讀完DSE上嚟，有啲係國內同胞過嚟讀銜接班，有啲係喺外面做咗幾年工返嚟再讀書嘅學生。呢幾班同學仔男性比較多，有時我會做啲性格調查，發現大部份男士佢哋話自己都係性格內向。內向得來佢哋又會做運動又報讀咗考消防、紀律部隊、懲教署等嘅有關職業科目。

以前阿爸阿媽年代去做得運動多嘅人大部份都係性格外向，訪問咗幾個男學生問佢哋點解想報消防，大部份答案係除咗操體能之外，其他時間都係空閒，同學仔開玩笑話仲可以燒雞翼同打邊爐。我問佢哋有冇為人民請命嘅使命感呢？佢哋只係笑笑口。

我問佢哋咁內向識唔識到女仔嘅呢？呢一代嘅男性可能比較幸福，女性比較主動去追擊識男朋友，好多男性同學話都係等女性追㗎。可能因為人口唔平均嘅原因，現今嘅人口女性比男性多65萬人左右，每1000名嘅女士就對908名男士，可能因為呢個原因女性可能要比較主動去追擊。

究竟呢個世代仲有冇男仔追女仔嘅呢？個男仔會唔會喺班房門口等女仔放學嘅呢？男仔會唔會喺個女仔屋企樓下等佢出現扮咁啱撞到㗎呢？筆者好想探討吓個趨勢，如果有男讀者睇完呢篇文章，歡迎你發表心聲。

Z世代嘅男女倚賴網絡及電子產品及傾向即時通訊軟件溝通，例如WhatsApp同微信等。佢哋會追求工作彈性同自由，多數會喜歡成為Slasher一族。所以做父母嘅你可能要理解佢哋嗰個性多啲，傳統嘅職業朝九晚六嘅時間究竟會唔會再成為佢哋追捧嘅行業呢？

Z世代偏向冇階級觀念，喜愛多元發展同埋新嘗試嘅工種？其實呢個趨向係有跡可尋，當AI可以代替大部份嘅工種嘅時候，我哋都迫於無奈一人扮演多個角色去做不同工作。

筆者在課堂教學當中，希望同佢哋溝通多啲了解多啲，將自己同新時代接軌。希望X及Y世代嘅你都會明白呢個Z世代的年青人嘅改變。