感欣的生活隨筆 - 自動回收功能

筆者記得初出道返工做嘢用電郵嘅時候，喺電郵系統度有個叫做回收嘅功能，當你發送咗寫完有關工作事項俾個客後，先至發覺有錯即刻撳回收嘅功能，但係個客係實質收到你電郵，只不過電郵通知前面有交叉識別，佢係仍然可以睇到你嘅內容，好多時佢喺嗰邊睇埋已刪除電郵而已經心裏有數知道你原本想法，再覆你已更正嘅電郵。

隨着時代進步改變，電話裏面嘅WhatsApp 及WeChat回收功能十分之先進，可以刪除之前嘅通話記錄。筆者認為呢個係偉大嘅發明，令到好多事情避免拗撬。試過幾次因自己發好大脾氣而錄音比對方，講咗好多太衝動唔應該講嘅說話，但隔了一兩分鐘之後，自己冷靜下來而發覺對方仍未聽錄音，即刻刪除原有錄音通話，我就可以平心靜氣好理性咁回覆對方。避免好多不必要嘅爭拗而傷害大家感情。

最近一兩年電話嘅OS不斷更新功能之後，喺WhatsApp同埋WeChat嘅修改功能就更加先進，可以喺WhatsApp頂部有標籤及有投票功能。呢個功能為筆者教學當中帶嚟很多方便及工作更有效率，例如記錄班學生投票邊日補課，或者有幾多學生想我幫佢哋打印功課等事項。

呢啲功能令到人與人之間嘅關係可能少咗磨擦同埋爭拗。細個嘅時候未有WhatsApp或者WeChat，每日淨係掛住聽電話同人溝通去辦好件事，大量電話轟炸真係令到人好疲累，如果喺返工時間唔停咁講咗幾個鐘頭電話，放工後簡直乜嘢都唔想講及唔想做。而家有咗文字對話及錄音功能，我哋可以選擇幾時睇同唔睇，亦都可以深思熟慮諗過之後先至回覆。以前俗語講：「講咗嘅說話，出咗去就收唔返。」呢句說話喺現代嚟講可能大家要面對面嘅時候先至會發生。

先進嘅科技可能會帶俾人類有和平相處嘅時候。筆者好想多謝發明WhatsApp同WeChat嘅團隊。但諗深一層當科技再發展嘅時候可能會帶俾人類有好多孤獨嘅時刻及分離感，因為對於個人生活享受方面，科技實在提供到太周到同太便利嘅服務功能，一個人生活已經可處理周到，將來生活可能再唔需要有任何人嘅幫忙，人同人嘅接觸嘅頻密程度會慢慢減少。一個人住可以養電子狗同自己娛樂，亦都可以買個假公仔嘅伴侶同自己結婚等等。

我哋而家好珍惜嘅「人情味」，可能會慢慢消失，而家大部份嘅細路已經唔識再執鉛筆用手寫字，寫毛筆字可能好快會列入做物質文化遺產，人類嘅腦部進化可能因科技發達而漸漸萎縮。筆者個人認為社會要思考下科技與人類嘅發展點樣才可攞個平衡，人際關係嘅精髓點樣得而承傳下去。

____________________________________________________________________

筆者：感欣

用感覺去欣賞世界，我們也時常感恩有你同行

快速消費品商業顧問

教育斜槓族：大學講師，幼稚園中小學課外活動老師，監考員，秘密調查員等等.....

讀者意見： joa22022024@hotmail.com